Umwanditsi:Anselme Tuyizere

Shavy Warren Babicka ukomoka muri Gabon yaguzwe na Toulouse Football Club yo mu cyiciro cya mbere mu Bufaransa, yemezwa nk'umukinnyi wayo mushya.

Shavy Babicka yakiniye Kiyovu Sports kuva muri 2018 kugeza muri 2021.

Ku mugoroba wo kuri uyu wa Kane, tariki ya 18 Mutarama 2023, ni bwo Toulouse Football Club yanyujije ubutumwa ku mbuga nkoranyambaga zayo ivuga ko yamaze kongera imbaraga mu ikipe, isinyisha abakinnyi bashya.

Ni nyuma y’uko mu minsi ishize iyi kipe yari yasinyishije umukinnyi wo hagati Yann Gboho ikaba yanejejwe no kumwongeraho undi wo ku ruhande uturuka muri Gabon.

Shavy Warren Babicka w’imyaka 23 yakiniraga Aris Limassol yo mu Cyiciro cya Mbere muri Cyprus yavuyemo aguzwe miliyoni 2,7€ ku masezerano y’imyaka itatu yasinye muri iyi kipe ikina League 1.

Babicka yatangiriye umupira muri AS Mangasport y’iwabo akomereza muri Kiyovu Sports mu 2018 mbere yo kwerekeza ku Mugabane w’u Burayi mu 2021.

Babicka uca ku mpande muri barutahizamu yitezweho byinshi muri Toulouse

Shavy Babicka yakiniye Kiyovu Sports kuva muri 2018 kugeza muri 2021

Uyu mukinnyi wahawe nimero 80 yafashije iyi kipe mu mwaka w’imikino wa 2022-23 kuko yayigejeje ku Gikombe kiruta ibindi muri iki gihugu cya Cyprus Super Cup. Mu mikino 26 yaherukaga kuyikinira yayitsindiye ibitego bitanu ndetse atanga imipira itandatu ivamo ibitego.

Shavy Babicka yahawe nimero 80 muri Toulouse FC

Uyu ni Umunya-Gabon wa kane ugiye gukinira iyi kipe nyuma ya bene wabo bayikinnyemo barimo Pierre-Emerick Aubameyang, Mario Lemina na Denis Bouanga.